რა ხერხებს მიმართავენ მძღოლები ტექდათვალიერების გასავლელად
2018 წლიდან საქართველოში ავტომობილების ტექნიკური დათვალიერება ეტაპობრივად დაიწყო. პირველი იანვრიდან დაიწყო იმ ავტომანქანების ინსპექტირების პროცესი, რომლებიც, მანამდეც სავალდებულო შემოწმებას ექვემდებარებოდნენ. ესენია: სამგზავრო და სატვირთო ავტომობილები. პირველი ივლისიდან ინსპექტირება სავალდებულოა სახელმწიფო უწყებებისა და იურიდიული პირების კუთვნილი ავტომანქანებისთვის, ოქტომბრიდან კი - დიდი მოცულობის ძრავის მქონე ავტომობილებისთვის.
2019 წლის 1 იანვრიდან 31 დეკემბრის ჩათვლით კი, ინსპექტირებას გაივლის საქართველოს დანარჩენი ავტოპარკი - ანუ ყველა ავტომობილი.
უკვე თითქმის ერთი წელია, სავალდებულო ტექდათვალიერების სისტემა მუშაობს, ამ სფეროში ჩართულ ორგანიზაციები კი სისტემის ხარვეზებზე საუბრობენ.
ორგანიზაციაში „საქართველოს ალიანსი - უსაფრთხო გზებისთვის" აცხადებენ, რომ არსებობს შემთხვევები და ვარაუდები, როცა მძღოლები ინსპექტირების გასავლელად გარკვეულ ხერხებს მიმართავენ.
„ვხვდებით პრეცენდენტებს, როდესაც მძღოლები გარკვეული მანიპულაციებით გაატარებენ ტექინსპექტირებას ავტომობილებზე და 2-3 დღეში კვლავ არიან დამაბინძურებლები ან გზებზე საფრთხის შემქმნელები.
არის ვარაუდები, რომ ასეთი რამ ნაცნობობით კეთდება, მაგალითად საბურავების ნათხოვრობა ან ქირაობა, არსებობს მინარევების მეშვეობით გამონაბოლქვის შემცირების შემთხვევები. ეს ინფორმაცია არსებობს და დიდი ეჭვია, რომ ეს კეთდება შიგდაშიგ",- აცხადებს ეკა ლალიაშვილი.
მისივე თქმით, იმისთვის, რომ მსგავს შემთხვევებს ტენდენციის სახე არ მიეცეს, საჭიროა, დროული რეაგირება და მონიტორინგის სისტემის გაუმჯობესება.
ლალიაშვილის აზრით, პროცესის ეფექტურობისთვის მნიშვნელოვანია თავად ტექნიკური ინსპექტირების ცენტრების მუდმივი და დაუგეგმავი მონიტორინგი, მათ შორის მისტიური კლიენტის სისტემის დანერგვა.
ავტორი: სალომე მეცხვარიშვილი
წყარო : www.bm.ge